Драмски театар-Скопје ќе биде домаќин на гостувањето на Народниот театар од Ниш со претставата „Брод на љубовта“ по текст на Небојша Ромчевиќ, во режија на Ангелчо Илиевски.
Ова е прво и возвратно гостување на нишкиот театар во ДТС кој во март на нивната сцена учествуваше со претставата „Фестен“ на меѓународниот фестивал „Театар на крстопат“.
На матичната сцена претставата е премиерно изведена во ноември 2016 година. „Брод на љубовта“, според истоимената драма, е траектот „Кримхилда“ што крстосува на релацијата Либек – Санкт Петербург. Неговите патници се сексуални печалбари од источноевропските (некогаш комунистичките) земји кои се во потрага по заработувачка и подобар живот, односно Европејци од средниот сталеж кои се во потрага по задоволства, забава и заборав.
Покрај режисерот Илиевски, во екипата од земјава се вклучени и сценографот Валентин Светозарев и костимографката Марија Пупучевска. Автор на музиката е Боривоје Младеновиќ, а кореограф Небојша Громилиќ. (МИА)
