Во организација на Српскиот културно информативен центар СПОНА, во среда, 14 септември, во кафе-книжарницата „Буква“ со почеток во 19 часот, белградскиот писател, новинар и музичар Бранко Росиќ ќе го промовира својот трет роман „Доаѓањето на матадорот“, објавен летово во издание на издавачката куќа „Лагуна“ од Белград.

На промоцијата која ќе ја води новинарот Иван Беќковиќ, освен за актуелниот роман на Росиќ, ќе се зборува и за неговите претходни книги, помеѓу кои „За утре најавуваат конечно разведрување“ и „А така добро почна“, а посетителите бесплатно ќе добијат и примерок од магазинот „Недељник“, кој Бранко го уредува.

На промоцијата ќе бидат претставени и содржините кои се најдоа во актуелниот број на „Слово“, гласилото на СПОНА, двомесечник кој ги следи културните активности на Србите во Македонија.

Во случај временските прилики да оневозможат одржување промоција на отворено во „Буква“, алтернативен простор е во просториите на КИЦ СПОНА, ист ден, во исто време. (МИА)