Останаа уште четири реванш натпревари во осминафиналето од Лигата на шампионите, а планот на Европската куќа на фудбалот (УЕФА) е да ги премести сите во Порто и Гимараеш, пренесоа синоќа медиумите ширум светот.

Бидејќи последниот турнир во елитното натпреварување се игра во Лисабон (12 август), ова во голема мерка би ја олеснило организацијата според протоколите за коронавирусот, но и ќе им наштети на некои тимови.

Во тој случај, најлошо би поминал Манчестер Сити, кој има предност од 2:1 по гостувањето кај Реал Мадрид и со тоа ќе ја загуби предноста на домашниот терен. Бројни светски медиуми јавуваат дека „граѓаните“ лобираат против ваквиот исход, а слично се чувствуваат и во Барселона, која очекуваше реванш на својот „Камп Ноу“ по ремито во Неапол (1:1).

Јувентус исто така го чека реваншот од Лигата на шампионите во дефицит, со оглед дека загуби во Лион (1:0), додека Баерн е, можеби, најнезагрижен, бидејќи рутински го совлада Челси во Лондон (3:0).