Капитенот на Фиорентина, Давиде Астори почина од срцев удар на 4. март оваа година. Ноќта во пресрет на мечот против Удинезе, срцето му престанало.

Фиренца и натаму тагува за својот омилен капитен, а тренерот на „виолетовите“, Стефано Пиоли во разговор за еден локален медиум се присети на трагичната недела во која фудбалскиот свет остана без фантастичен играч и уште подобар човек.

-Имам свои навики, секогаш станувам рано и појадувам во 7:30. Така беше и овојпат. Се подготвував за натпреварот, размислував како да го мотивирам мојот тим што повеќе. Во тој момент ми се јави ќерката Карлота и разговаравме, а потоа ми се јави докторот Лука Пенгуи нашиот менаџер Алберто Марангон да дојдам доле во хотелот што побрзо, се присети Пиоли и продолжи:

„Дојдов во собата 118 во пижами, нашиот голман Марко Спортиело веќе беше тука. Ми кажа: Тренеру Давиде замина…“

Токму Спортиело беше последниот кој го виде Давиде жив. Тие двајца играле плејстејшн речиси до полноќ во собата на Спортиело, а потоа Давиде отишол да спие. Таа вечер ги заборавил своите копачки, па му испратил порака на Марко наутро дека ќе дојде по нив во пресрет на мечот кој требаше да се одигра во 12:30.

-Кога ја отворив вратата од хотелската соба, ги видов Пенгуе и Марангон како плачат, Астори лежеше на креветот. Се чинеше како да спие… Најтешко беше да одам и на останатите играчи да им кажам што се случи. Не би го посакал тоа никому, одвај разговараше Пиоли во текот на разговорот бидејќи сеќавањата очигледно се уште болни, па продолжи:

-„Се уплашив за своите играчи. На тренингот по погребот на Давиде ни беше најтешко. Можеби нашите млади играчи потполно не разбираат што се случи. По заминувањето на Давиде, се се’ промени. Да се работи и тренира без него е празно, се чувствуваме сите така. И натаму патам без него. Имавме фантастична симбиоза, ми недостасува неговиот глас на теренот“.