Л.А. Лејкерс ги прекинуваат преговорите со Њу Орлеанс за трансфер на Ентони Дејвис, соопштува „Лос Анџелес тајмс“.
„Езерџиите“ се лути на нереалните барања на Пеликанс за својата суперѕвезда и како резултат на тоа, ги запираат разговорите, барем во оваа фаза.
Според информациите, последниот предлог на тимот од Калифорнија бил Лонзо Бол, Кајл Кузма, Брендон Инграм, Џош Харт, Ивица Зубац, Кентавиус Колдвел-Поуп и два избора од првиот круг на Драфтот за „веѓата“ и Соломон Хил, кој е со голем договор.
Се тврди дека, сепак, Њу Орлеанс побарале меѓу 6 и 8 идни избори од Драфтот, што веќе било премногу и засега разговорите се прекинати, бидејќи Меџик Џонсон и Роб Пелинка не мислат дека цената е оправдана. Тие можат да бидат обновени ако Пеликанс покажат поголема желба за постигнат договор и излезат со контра-предлог.
Се смета дека организацијата на „пеликаните“ е склона да почека до летото, а потоа повторно да започне преговори со различни тимови за кошаркарот, а тогаш и Бостон ќе може да се вклучи, и покрај гласините дека самиот Дејвис не сака да оди кај Селтикс.
