Кошаркарската репрезентација на Јужен Судан испиша историја откако успеа да се пласира на Светското првенство во кошарка.

Јужен Судан стана независна држава во 2011 година и важи за најмлада држава во светот, а ова беа нивни први квалификации за едно првенство и веднаш успеаа да изборат место меѓу најдобрите на планетата.

Селекцијата на Јужен Судан е предводена од некогашниот НБА кошаркар Ројал Ајви, во решавачкиот меч славеше над Сенегал со 83:75, а херој на победничкиот тим беше поранешниот играч на МЗТ Скопје Аеродром, Нуни Омот. Кошаркарот кој игра на позиција ниско крило успеа да постигне 26 поени и беше вистински лидер до историскиот успех на Јужен Судан, кој претпладнево го победи и ДР Конго убедливо со 82:61, па по 11 кола има биланс од 10 победи и само еден пораз.

Светското првенство во кошарка ќе се игра следното лето во Јапонија, Индонезија и Филипини. Од Африка сигурен патник освен Јужен Судан се селекциите на Брегот на Слоновата Коска и Египет.