Македонскиот ракометен суперлигаш Бутел Скопје донесе уште еден млад ракометар во своите редови пред стартот на новата сезона. Станува збор за Наум Тасески, кој има 18 години и настапува на средната бековска позиција, а потпиша договор на две сезони.

Тасески досега беше дел од младинскиот тим на Вардар, а раководството на клубот од Бутел со овој потег уште еднаш покажа дека освен на сениорската екипа, мисли и на иднината, односно на младинските категории кои имаа одлични резултати минатата сезона.

Претходно за Бутел Скопје потпишаа левиот бек Илија Табаков, кој дојде од прволигашот Борец Велес и има 18 години, како и Андреј Петрушевски, кој исто така има 18 години, дојде од екипата на Вардар и настапува на позицијата десен бек.

Потпиша и левото крило Дамјан Субашевски од Металург РА, а беа потпишани професионални договори на две сезони со шестмина ракометари од младинската школа – Дејан Михајловиќ, Марко Каевски, Петар Цветковски, Филип Бошковски, Наум Симјановски и Стефан Јовевски.

Тимот, предводен од Кристијан Грчевски, се засили со голманот Филип Ивановски, како и бековите Мартин Манасков, Стефан Крстевски и Филип Николов, а покрај тренерот Грчевски договорите ги продолжија пивотите Јевтиќ и Стојчевиќ, како и бекот Стојановски.