Српскиот министер за надворешни работи Ивица Дачиќ изјави вечерва дека српскиот претседател Александар Вучиќ „брутално“ ја отфрлил точката за признавање на независноста на Косово.
Тоа е дел од предлогот од 16 точки на состанокот во Белата куќа со косовските претставници.
Дачиќ за ТВ Пинк изјави дека, според последните информации што ги добил од Вашингтон, Вучиќ „многу брутално ја отфрлил точката 10“, која, како што изјави министерот за финансии Синиша Мали пред медиумите, бара меѓусебно признавање на Белград и Приштина.
,,Вистина е дека документот со сите овие предлози, вклучувајќи ја и точката 10, е на преговарачката маса и од Вашингтон добив информација дека Вучиќ ја отфрлил таа точка на „многу брутален начин“, рече Дачиќ во специјалната емисија на ТВ Пинк по повод дијалогот на Белград и Приштина, кои започнаа преговори денес во Белата куќа под покровителство на американската администрација.
Тој јасно рече дека тоа е неприфатливо за Србија и дека Вучиќ ќе постапува во согласност со уставот. Нема прашање дали Вучиќ ќе го прифати тоа или не, истакна Дачиќ, наведувајќи дека тој „цитирал како што му било кажано од Вашингтон“.
„Нашата делегација не го измисли, тие прочитаа што е напишано во тој документ на масата“, рече Дачиќ, коментирајќи ја веста дека специјалниот пратеник Ричард Гренел ги демантирал тврдењата на медиумите дека на Србија и бил предаден документ со кој се признава независноста на Косово.
Дачиќ рече дека документот со текстот никогаш порано не бил презентиран пред српската делегација.
Тие разговарале и за други работи, за економијата и ова е обид за проширување на темите, рече Дачиќ, потенцирајќи дека се очекуваат разговори во Брисел на 7 септември и дека Германија и Франција, институциите на ЕУ, исто така се заинтересирани за решение.
,,Имате и членови на Советот за безбедност што чекаат на тоа решение. Има многу актери и несомнено е дека ова е еден од обидите да се има одредена ексклузивност и, со посредство на голема сила, како што се Соединетите држави, да се дојде до решение, рече Дачиќ.
Тој истакна дека „без договор со Србија, нема решение за косовското прашање“ и дека „договорот со Србија значи правично решение“.
Членот на српската делегација во Вашингтон, министерот за финансии Синиша Мали, за белградските медиуми порано изјави дека српската делегација добила „никогаш полош документ“ од почетокот на преговорите и дека меѓу 16-те точки, точката 10 подразбира заемно признавање.
