Силно невреме пристигна и во Србија. Први на удар беа делови од Западна Србија. Републичкиот хидрометеоролошки завод (РХМЗ) предупреди дека денеска во Србија ќе има значителна промена на времето, а во вториот дел од денот ќе има и невреме пропратено со обилни врнежи од дожд, град и ветер. Црвен метеоаларм е вклучен во пет региони – Банат, Белград, Шумадија, Поморавље и Источна Србија, јави дописникот на МИА од Белград.

Во раните попладневни часови имаше силно невреме во Белград. За кратко време поради големото количество дожд, многу улици беа поплавени, сообраќајот е забавен, а во поединечни делови во прекин е градскиот сообраќај кој се одвива со трамваи и тролејбуси.

Во голем дел од градот падна и град со големина на орев, предизвикувајќи штети на зградите. Силниот ветер корнеше дрвја, носеше контејнери и покриви од неколку куќи, а во одделни делови на Белград извесен период имаше прекини во снабдувањето со електрична енергија.

Поради забраната за полнење гориво и привремениот прекин на струја на белградскиот аеродром „Никола Тесла“ поради неповолните временски услови, како и губењето на аеродромските слотови, од Ер Србија соопштија дека може да има доцнења, па дури и потенцијално откажување на одреден број летови планирани во текот на денот.