Во Главниот центар за броење во Сараево започна пребројувањето на гласачките ливчиња за претседател на Република Српска.

Претседателот на Централната изборна комисија на Босна и Херцеговина Суад Арнаутовиќ ги отфрли обвинувањата дека Државната изборна комисија донела незаконска одлука за пребројување на гласовите за тоа изборно ниво, јави Бета.

– Овде нема политика или незаконски дејствија, ние ги следиме изборите согласно законот, имаме индиции и сознанија за палење на гласачки ливчиња, означување на гласачки ливчиња, неправилно пакување на изборниот материјал, неискористени ливчиња и затоа ќе направиме јавно пребројување овде, рече Арнаутовиќ.

Директорот на Главниот центар за броење, Горан Мишковиќ изјави дека прво ќе се пребројат избирачките единици Бањалука и Бјелина, а потоа ќе се пребројат гласовите од Добој. Тој изјави дека ќе работат во три смени.

ЦИК претходно ги покани јавните телевизиски сервиси во БиХ – БХРТ, Радио-телевизијата на Федерацијата БиХ (ФТВ) и Радио-телевизијата на РС (РТРС), како и други заинтересирани комерцијални медиуми, директно да го емитуваат пребројувањето на гласовите на гласачки ливчиња.