Веројатно е дека повеќе од 18 милиони луѓе ширум светот починале од Ковид, три пати повеќе отколку што сугерираат официјалните податоци.

-Ова го велат научниците кои го објавија својот извештај две години откако Светската здравствена организација (СЗО) прогласи пандемија, пишува Би-би-си.

Тим на научници од Американскиот универзитет во Вашингтон го истражувале вишокот на смртност во 191 земја за да го добие вистинскиот број на смртни случаи во светот. Имено, некои смртни случаи се случиле поради вирусот, додека други се поврзани со инфекција. Инфекцијата со Ковид може да ги влошила другите веќе постоечки медицински состојби, како што се болести на срцето или белите дробови.

Метриката што се користела се нарекува прекумерна смртност и мери колку повеќе луѓе починале од очекуваното во споредба со претходните години, пред да избие пандемијата. За да го пресметаат ова, истражувачите собрале податоци од различни владини веб-страници, Светската база на податоци за смртност, базата на податоци за смртност на луѓето и Европската статистичка канцеларија.

Се проценува дека стапките на вишок смртност варираат драматично во различни земји, но вкупната глобална стапка во студијата е 120 смртни случаи на 100.000 луѓе. Тоа би значело дека поради Ковид имало околу 18,2 милиони смртни случаи за две години, од почетокот на 2020 до крајот на 2021 година, што е три пати повеќе од официјалните 5,9 милиони.

Проценките на вишокот на смртност биле пресметани за целиот период на студијата, наместо по недела или месец, поради доцнење и недоследности во пријавувањето на смртните случаи од Ковид, што може драстично да ги промени проценките, истакнуваат истражувачите.

Според студијата објавена во престижното медицинско списание „Лансет“, највисоки стапки имало во земјите со пониски приходи во Латинска Америка, Европа и субсахарска Африка. Но, бројот на починати бил доста висок во некои земји со високи приходи, како што се Италија и делови од Соединетите држави.

Петте земји со највисок проценет вишок стапки на смртност се Боливија, Бугарија, Есватини, Македонија и Лесото. Најниски стапки се во Исланд, Австралија, Сингапур, Нов Зеланд и Тајван.

За Обединетото Кралство, проценетиот вкупен број на смртни случаи поврзани со Ковид во 2020 и 2021 година бил сличен на официјалните бројки, околу 173.000, со прекумерна стапка на смртност од 130 луѓе на 100.000.

Главниот автор на студијата, др. Хаидонг Ванг од Институтот за здравствена метрика и евалуација рече: „Разбирањето на вистинскиот број на смртни случаи од пандемијата е клучно за ефективно одлучување за јавното здравје. Студиите од неколку земји, вклучително и Шведска и Холандија, сугерираат дека Ковид е директна причина за повеќето смртни случаи, но моментално немаме доволно докази за повеќето други локации. Понатамошните истражувања ќе помогнат да се открие колку смртни случаи биле директно предизвикани со Ковид и колку биле индиректни последици од пандемијата.

Истражувачите предвидуваат дека прекумерната смртност поврзана со пандемијата ќе се намали благодарение на вакцините и новите третмани. Но, тие предупредуваат дека пандемијата сè уште не е завршена. И може да се појават нови, опасни варијанти на вирусот.