Германската министерка за семејство, Франциска Гифи, денеска поднесе оставка по повеќегодишни обвинувања дека препишала делови од својата докторска дисертација.

-Донесов одлука да ја замолам германската канцеларка Ангела Меркел за разрешување од должноста сојузна министерка за семејство, стари лица, жени и млади, напиша оваа членка на Социјалдемократска партија во својата писмена оставка.

Заднината на нејзината оставка е преиспитувањето на нејзината докторска дисертација од 2010 година. Комитетот на Слободниот универзитет во Берлин (ФУ) уште во 2019 година одлучи да и се одземе докторатот на министерката, но постапката беше повторно отворена минатата година, по што Гифи се откажа од докторската титула.

Процесот се уште не е завршен, но Гифи одлучи уште сега да се повлече за „владата, партијата и јавноста да имаат појасна слика“.

Гифи кажа дека ја напишала својата дисертација на тема Европската комисија „со најдобри намери и волја“ и дека жали доколку притоа и се протнале грешки.

Таа додаде дека ќе ја прифати евентуалната одлука за поништување на докторатот.

Социјалдемократска политичарка ќе ја задржи својата позиција како главен кандидат на СДП во сојузната покраина-град Берлин.

Пред десет години, министерот за одбрана Карл Теодор фон Гутенберг и две години подоцна, министерката за образование Анет Шаван, поднесоа оставки во врска со обвиненијата за плагијат.