Најдобриот фудбалер на Сенегал, Садио Мане, се повреди вчера во победата на Баерн Минхен над Вердер (6-1), а денеска стигна потврда дека станува збор за потешка повреда и оти речиси сигурно ќе го пропушти Светското првенство во Катар кое стартува на 20 ноември.
Мане на натпреварот против Вердер доби удар во коленото и го напушти теренот во 20 минута.
Тренерот на Баерн, Јулијан Нагелсман по натпреварот рече дека клубот е во очекување на дополнителни лекарски прегледи, кои, за жал, денеска донесоа лоши вести за Мане и Сенегал.
Францускиот весник „Ле Екип“ објави попладнево дека Мане ја повредил тетивата и ќе паузира најмалку еден месец.
Мане е најдобар стрелец во историјата на Сенегал со 34 голови на 93 натпревари.
Сенегал на Мундијалот во Катар ќе игра во група со домаќинот, Еквадор и Холандија.
