Финалистот на Светското првенство во 2018 година, селекцијата на Хрватска, ја започнува својата кампања на Мундијалот во Катар денеска (11 часот) со мечот против Мароко во групата Ф. Натпреварот е прв од дневниот распоред и ќе се игра на стадионот „Ал Баит“.
Иако Хрватска не се смета за еден од големите фаворити, тие се способни да ги изненадат големите репрезентации и да одат далеку на турнирот, како што направија пред четири години, победувајќи ја Англија во полуфиналето.
Ова е шести настап за „коцкестите“ на светските првенства откако Хрватска стана независна земја. Од 1998 година Хрватите го пропуштија само Светското првенство во 2010 година.
Селекторот на Хрватска, Златко Далиќ, е дециден дека неговите играчи нема да го потценат Мароко на претстојната пресметка во групата Ф. Според него, шокантната победа на Саудиска Арабија над Аргентина (2-1) и ремито без голови меѓу Тунис и Данска покажува дека нема слаби репрезентации на турнирот.
„Веруваме дека ќе биде многу тежок натпревар. Ќе се адаптираме и ќе играме со срце. Ќе покажеме голема мотивација и почит кон нашите противници“, изјави Златко Далиќ.
