Премиера на театарската претстава „Чиста хероина“, според текстот „Лична Ангелина (Чувари на честа)“ на Загорка Поп-Антоска Андовска, а во режија на Ѓорѓи Ризески, ќе се одржи вечерва во Јавна соба.
„Лична Ангелина (Чувари на честа)“ е драма која е напишана во стих, со архаичен говор близок на епската песна „Болен Дојчин“, се случува во митско време, и го следи веќе воспоставениот однос на Болен Дојчин и сестра му, Лична Ангелина.
Ликовите на Болен Дојчин, Умер Бичакчија, Митре Поморјаче и Павле Плетикоса драматуршки се споени и ги толкува Марко Илиќ, а ликот на Лична Ангелина го толкува Надица Петрова. Оригиналната музика за претставата ја работеше Александар Андовски, а музички соработник е Викторија Чочороска. Костимографијата и сценографијата се потпишани колективно.
Продуцент на претставата е Центарот за образование, култура и уметност „Данаил Станојески“ познат како ДАСТА Академија.
Ова е прв проект на ДАСТА Нетворкинг, платформа која вмрежува млади уметници и искусни уметници, јавни и приватни институции од културата, приватни компании, образовни институции, со цел да се поддржат квалитетните проекти кои немаат финансиска поддршка или пак поддрпката е многу мала. Проектот го поддржаа Културно информативниот центар – КИЦ, Конгресен центар Александар Македонски. (МИА)
