Голема трагедија ја погоди Словенија. Според тамошните медиуми, поранешниот словенечки фудбалер, Роберт Певец (38) брутално ја претепал сопругата, а таа починала од ударите што ѝ ги нанел, пренесе ГОЛ.МК.

Засега ова се неофицијални информации, но од словенечката полиција потврдија дека во Дравоград се случило убиство поради што медицински екипи и полицијата морале да излезат на терен.

„38-годишен маж, кој имал забрана да ѝсе приближува на 33-годишната жена, се појавил пред нејзината врата и се обидел да изврши убиство. Полициските службеници кои излегле на местото веднаш го привеле осомничениот и ѝ укажаа прва помош на повреденото лице кое беше префрлено во болница во Словењ Градец“, се вели во полицискиот извештај.

Жртвата починала еден ден подоцна во болнички кревет. Според словенечките медиуми, поранешниот фудбалер моментално е во притвор од 48 часа, по што ќе биде изведен пред истражен судија. Роберт и неговата сопруга се во брак од 2019 година, а заедно имаат и две деца. Според полициските извештаи, синовите биле во куќата кога било извршено кривичното дело, пренесе порталот.

Певец своевремено беше словенечки репрезентативец до 17, 20 и 21 година, а во кариерата настапуваше во родната земја и Австрија.