Македонската фудбалска репрезентација повторно и ја расипа математиката на селекцијата на Италија. „Аѕурите“ од Скопје си заминуваат без победа, со освоен еден бод од квалификацискиот натпревар за пласман на Европското првенство.
Македонската фудбалска репрезентација вечерва пред 28.000 гледачи на Националната арена „Тодор Проески“ во Скопје одигра нерешено 1-1 (0-0) против Италија.
Почетокот на второто полувреме донесе водство на Италија во 47 минута преку капитенот Чиро Имобиле кој со гол ја заврши акцијата во која Николо Барела ја погоди пречката.
По примениот гол „црвено – жолтите“ тргнаа во целосна офанзива и откако обидот од 17-ина метри на Елиф Елмас заврши крај стативата во 68 минута, израмнувањето го донесе капитенот Енис Барди со мајсторски гол од слободен удар во 81 минута, предизвикувајќи делириум на трибините.
🎯 İşte Kuzey Makedonya Millî Takımının Kaptanı ve 10 numaralı oyuncusu, futbolcumuz Enis Bardhi’nin; İtalya’ya attığı frikik golü! 🚀 pic.twitter.com/b8ScdguE09
— DikFutbol (@dikfutbol) September 9, 2023
До крајот на натпреварот македонската одбрана одолеа на италијанските напади за четврти бод во петтиот натпревар во евроквалификациите.
Избраниците на селекторот Благоја Милевски ќе ги продолжат евроквалификациите со гостување во Малта во вторник.
