Македонија како никогаш досега помлада ќе настапи на еден голем ракометен собир. Легендите Лазаров, Стоилов, Миркуловски, Ристовски… нема повеќе да ги гледаме во дресот со националниот грб, а нивното место го зазедоа момци од кои се очекува да бидат иднината на македонскиот ракомет.

Така, Македонија на Светското првенство во Шведска и Полска ќе настапи со плејада млади момци, а во ростерот на селекторот Кирил Лазаров има дури СЕДУМ дебитанти. Тоа се Павле Атанасијевиќ, Петар Атанасијевиќ, Марко Стојковиќ, Томи Јагориновски, Иван Џонов, Михајло Младеновиќ и Коста Петров.

Македонија веќе подолго време е во фаза на подмладување на тимот, но како никогаш досега не настапила со толку млади ракометари и толку дебитанти. Но, и покрај овој факт, репрезентативците во подготвителниот дел покажаа дека поседуваат квалитет и мотив да се надигруваат со најдобрите на светот.

„Новата“ Македонија своето деби на овој шампионат го има вечерва, против големиот фаворит Норвешка (20:30).