Ракометна Македонија го очекува вториот натпревар на репрезентацијата предводена од Кирил Лазаров на Светското првенство. Ако во првиот меч се знаеше дека Норвежаните се апсолутен фаворит, во вториот Холандија е во стартна предност, ама не е непобедлива.

Средбата од првата рунда во „Таурон Арената“ во Краков мина во знакот на црвено-жолтата боја. Норвешка можеби доминираше на теренот, ама „фалангата“ доминираше на трибините. Слично се очекува да биде и во дуелот против „лалињата“, а македонските навивачи од рано наутро се подготвуваат за натпреварот.

По улиците на полскиот град ечат песни од навивачите од Македонија, а заедно со хармоникаш кој свири во Краков одекна и популарната „Јовано Јованке“.

Атмосферата никогаш не била проблем, каде и да отиде македонската „фаланга“ прави забава и привлекува внимание, па така е и годинава во Краков. Македонија ќе брка изненадување против Холандија во натпревар кој се игра во 18:00 часот.

извор : gol.mk