Приштинските медиуми, повикувајќи се на свои извори, пренесуваат дека во нападот на припадниците на косовската полицијата утринава кај селото Бањска се убиени четворица напаѓачи.
Во медиумите се наведува дека постои можност лицата кои пукале во полицијата да се припадници на руската приватна безбедносна компанија Вагнер група, но агенцијата Бета не можела да добие потврда на таа информација од косовските институции.
Претходно косовската полиција потврди дека во размена на оган во атарот на селото Бањска е убиен еден од групата 30 „тешко вооружени и маскирани припадници на криминална група“.
Премиерот на Косово Аљбин Курти на конференција за новинарите прикажа снимки од лица со тешко вооружување, кои со шест возила без регистарски таблички и едно блиндирано возило, во маскирни униформи, влегле во манастирот Бањска во кој и околу кој наводно сè уште се наоѓаат.
Курти кажа дека припадниците на таа група ги опколиле специјалните сили на косовската полиција и ги повика да се предадат.
Косовската влада соопшти дека во нападот на полицијата „учествуваат значителен број маскирани професионалци во различни униформи, вооружени со тешко оружје, гранати, рачни ракетни фрлачи, оклопни возила“ и дека користат „различни приватни простори, вклучувајќи го и просторот во и околу манастирот Бањска, за движење, криење и пукање во полициските единици“.
КФОР: Продолжуваме да ја следиме ситуацијата, спремни сме да одговориме ако треба
Мировните сили на НАТО на Косово (КФОР) соопштија денес дека продолжуваат внимателно да ја следат ситуацијата во Бањска по нападот на припадниците на полицијата на Косово при што еден полицаец е убиен, а двајца се ранети.
Командата на КФОРсоопшти дека на подрачјето на Бањска се присутни трупи на таа воена организација и дека нејзините припадници се спремни да одговорат, ако е потребно.
„Косовската полиција, како линија која прва реагира во вакви ситуации, има примарна одговорност за управување со ситуацијата на теренот. Командантот на КФОРе во близок и континуиран контакт со сите меѓународни играчи, вклучувајќи ја Европската Унија, Генералштабот на војската на Србија и институциите на Косово, и интензивно работи на наоѓање излез од оваа ситуација“, порача командата на КФОР.
