Холандија ќе запре со користење на вакцината на АстраЗенека против Ковид-19 најмалку до 29 март како мерка на претпазливост, соопшти синоќа холандската Влада.
Одлуката, која следи по сличен потег на Ирска претходно во текот на денот, е одговор на извештаите од Данска и Норвешка за можни сериозни несакани ефекти, се вели во соопштението.
Тројца здравствени работници во Норвешка кои неодамна беа вакцинирани со производот се хоспитализирани поради крварење, згрутчување на крвта и тромбоцитопенија, соопштија здравствените власти.
АстраЗенека вчера соопшти дека спровела проучување на здравствените податоци на повеќе од 17 милиони луѓе вакцинирани со нејзиниот производ во Европската унија и Велика Британија и не открила никаква врска помеѓу вакцината и таквите здравствени состојби.
