Нови грижи за францускиот фудбалски состав во пресрет на големото финале. „Триколорите“ одново играат фантастичен турнир и заслужено се во големото финале на Светското првенство.

По полуфиналната средба со Мароко, од редовите на бранителот на титулата доаѓаат само лоши вести. Откако „триколорите“ беа погодени од мистериозен вирус, кој остави неколку играчи надвор од тренажен процес, сега Оливие Жиру е тој што загрижува.

Искусниот напаѓач, кој повторно игра брилијантно, се пожалил на болки на коленото, повреда која што ја почувствувал уште пред натпреварот со Мароко, но тогаш собра сили и започна од првата минута. Најдобриот стрелец во историјата на француската репрезентација во разговор со Дешамп наводно му соопштил дека и покрај сè сака да биде во почетниот тим, но последниот збор за тоа го има токму селекторот.

Уште од претходно се знае дека Конате, Упамекано и Варан се погодените фудбалери од мистериозниот вирус, но последните информации се охрабрувачки, бидејќи проблеми со вирусот имал само уште Варан, додека дефанзивците на Баерн Минхен и Ливерпул им се вратија на тренинзите.