За последните случувања на северот на Косово реагираше албанскиот премиер Еди Рама, осудувајќи ги „нападите и поставувањето блокади”.
-Нападите врз ЕУЛЕКС се за секаква осуда без двоумење, како што е за осуда секој акт на насилство врз косовската полиција. Повторното појавување на барикадите на северот на Косово е во спротивност со секој закон и со секој дух на дијалог и не само што не решава ништо, туку напротив дополнително усложнува сè, стои во реакцијата на Рама.
Според него, одложувањето на изборите од страна на косовските власти е сигнал на кој Белград мора одговорно да одговори.
-Одложувањето на изборите од страна на претседателката на Република Косово е значаен сигнал, на кој високите власти на Белград мора да одговорат со ист дух и чувство на одговорност, како не би дозволиле натамошна ескалација на дестабилизирачките акти, посочува тој.
Белград, оценува, мора да го употреби своето влијание врз Србите од северот на Косово.
-Белград мора да го употреби своето влијание врз Србите на Косово, без да ги оправдува нивните постапки, без оглед на причините. За причини се разговара, а не се користат како оружје против полицијата и како барикада против правниот поредок. ЕУ треба итно да свика на дијалог, заклучува Рама во реакцијата. (МИА)