Светот силно се потресе кога македонското МНР ги повика сите свои граѓани да ја напуштат Украина. Непребол. Онаа, старата добра приказна за жабата и коњот. Или новата неолиберална фантазмагорија – кога протекторат повикува на напуштање друг протекторат…
Истото претходно го стори и нашиот сојузник Бугарија, кој пред НАТО беше сојузник во Варшавскиот пакт, а пред тоа во Силите на оската, против Сојузниците. Не толку одамна. Сојузникот кој толку парадоксално му наложи на другиот сојузник и 134-та земја во светот според воена моќ, во ООН да се откаже од аспирациите кон нејзината територија?! Онаа иста територија која ја окупираа и анексираа по балканските војни. И Бугарите је мразеле историјата. Јок, ја мразат македонската историја. Ја мразат вистината. Исто ко и Грците, да не се лажеме.
Ова се голи историски факти поради кои во 22-та година од 21-от век Македонија го трпи она што ниедна држава во светот не би го трпела. И не, не е до соседите, туку до монтираната владејачка северџанска направија, натурена исто како и Преспанскиот и Договорот за НЕдобрососедство. Грците, барем, беа фер, не ставија глупости како ДОБРОСОСЕДСТВО во него…
И така, Северна веќе ПЕТ години секојдневно ги повикува сите свои освестени граѓани, особено Македонците, да потклекнат и да ја напуштат Македонија. Не само преку своите суртучки телали од Власта и армијата провладини упикувачки медиуми, она на „С“ го користи сите можни средства и начини за да ги натера сите свои граѓани да го сторат тоа, да ја напуштат оваа „територија“, да ги снема, да исчезнат по светските метрополи. Ако можат, пожелно е и да излезат од кожата на Македонецот.
Најсуптилниот пристап на северните штетници е создавањето аверзија кон сопствениот род, припадност која тие така неуспешно ја глумат, со уништувањето на онаа трунка достоинство што останало во државата која ја ничкосаа, пљачкосаа и заробија. Расчеречување на македонската чест, гордост и достоинство. До последен атом. Знаат пустите, дека тоа најмногу боли, кога гледаш како „твоите“ коленичат, клечат, целиваат туѓи стопала, кукаат, корнат коси, продаваат историја, светци, револуционери и ги покажуваат јавно сите варијации на една безрбетност. 50 нијанси од неа.
Лукративните ајвани тоа го прават на повеќе полиња, за не дај Боже, да не остават на случајот и некој Македонец да не ја сфати пораката. Па не’ урнисуваат и разоруваат на национално поле, историско, на економско, на здравствено, безбедносно, образовно, на културно. Да не остане ни случајна трошка надеж за подобра иднина и опстанок на македонштината на овие простори. Логиката им е едноставна, ако се чувствуваш дека си обесчестен и 5-то „разреден“ граѓанин во сопствената држава, чуму да не заминеш во друга каде барем системот функционира и властите нема да те срамат?
И додека послушните дилајли со полна пареа наголемо одработуваат во бркањето на Македонците од сопствената земја за конечно затворање на „непостоечкото“ македонско прашање, Бугарите и натаму „во петта“ штанцаат нова, лажна историја и шират омраза меѓу двете нации, Грците глумат стари демократи, а Европа заборава на вредностите кои ги декларира и истопорува само кога и’ одговара, едно столчено интровертно племе врие во себе, катадневно среде најголемите црнила го гали и зачистува „кубурот за црни денови“ и се крсти во фактот дека биле ПИРЕЈ, па никој не можел да го уништи. Од време навреме и ќе кажат и направат нешто. На Фејсбук…
Саган вели дека истребувањето е правило, а преживувањето исклучок. А за да бидеш исклучок, мораш и да сториш нешто околу тоа. Не, не на Фејсбук…